71歲嘅夏雨百足咁多爪，最近演而優則導，培育新演員。

不過，夏雨慚愧自己唔算係一個稱職嘅好爸爸，因為佢四十幾歲先同太太育有兩子一女，大仔黃奕晨（Dixon)今年28歲，早前加入ViuTV做藝人，同爸爸一樣揀咗演藝呢條路。

夏雨日前接受商台《1圈圈星光背後》訪問時，坦承與子女有疏離感，佢話：「生咗小朋友後，我哋全家人移民去加拿大，但我為咗賺錢，要長期做太空人，所以同仔女關係有啲疏離。」

夏雨承認呢樣喺佢人生中嘅一個遺撼，他稱：「因為佢哋細個嘅時候，我唔能夠經常喺佢哋身邊，所以佢哋好多心事都唔會同我講。佢哋雖然知道我好鍚佢哋，但佢哋都會藏喺心唔同我講。其實好無奈，我經常演『好爸爸』，我係不斷演做爸爸缺乏嘅事，以及劇本寫嘅嗰個爸爸嘅事情，所以有時候，我都唔知道我將自己投放喺角色上，還是角色放喺我人生裡面。」

相信囝囝Dixon都知道爸爸好錫佢哋，每逢夏雨生日同父親節都會一家人食飯氷祝，Dixon曾經喺ig留言話﹕「你(夏雨)缺點無數，但就係一個最完美既爸爸。上次工作時發現，原來我地冇咩合照。今次依個工作對我嚟講，其實意義好深刻。希望可以keep住佢，等到10年20年後我哋一齊拎返出黎睇。 Happy Father's Day Daddy!」

更多娛聞，喺晒《娛果》
http://fb.com/appledailyent