一向喺香港人氣高企的前港督「肥彭」彭定康，再次抵港宣傳新書，現身外國記者會演講時，就吸引咗人氣一樣咁勁的「薯片叔」曾俊華到場，政務司前司長陳方安生、曾出任佢政府內任行政局議員的現任恒生銀行董事長錢果豐亦有捧場。肥彭一入門口，回歸前曾任佢私人秘書的薯片叔即現身迎接，令肥彭興奮到大「AH!」咗一聲，再同薯片叔講：「How are you? Great to see you!（你好嗎？很高興見到你！）」，就同薯片叔攬到實一實，咬住耳仔進入貴賓室聚舊。

一向幽默的肥彭，自爆今次再訪外國記者會時，有記者透露喺佢做港督時，自己仲未出世，令肥彭慨嘆自己好老餅，其間更將兩個愛囡擺上枱，話:「我現時有兩個女，比法國總統(馬克龍今年39歲)仲老!」，結果引來與會者爆笑。

肥彭又話，早前送咗自己上一本新書《What Next?》畀95歲皇夫、愛丁堡公爵菲臘親王（Prince Philip），結果獲菲臘親王親自回信，信中寫：「What next? When you are my age, there is only one answer.（接著是甚麼？當你是我這年紀時，只有一個答案）」，結果再次引來與會者爆笑。今年73歲的肥彭話，自己本可以同菲臘親王一樣諗法，但佢決心未來幾年要「製造越多麻煩越好」，希望可以為駁斥民族主義（Nationalism）出一分力，批評呢種思想正危害緊下一代，令社會不能保持繁榮、安全同穩定喎。

亦有人搞笑問肥彭，若然佢現時係英國首相，佢會做啲乜？肥彭就話會到訪香港，同埋做幾件西裝，並且對英國政府最近發表的「香港半年報告」比過去誠實同敢言感到欣慰喎。