上市公司主席返工、見客，衣着千篇一律黑白灰，極其量配件顏色恤衫，樣子有點卡通的康宏理財（1019）主席王利民卻喜歡大花恤衫、大花領帶，腳踏一對棗紅色尖頭鞋，十足十男版天生購物狂，或者是財經版黃偉文。

王利民否認是購物狂，不過加多句「正如你唔會認自己係儍嘅」。他大學二年班已兼職做中介金融產品銷售員，畢業後投身保險界，都是先敬羅衣後敬人的行業，助長他喜歡買衫買鞋的本性。
月花一萬幾千置裝對王利民自然濕濕碎，其購物哲學是「入舖頭已經嘥咗我時間，冇理由空手而回」，他自信地說：「入得一間舖，一定買到嘢，買唔到嘢，間舖頭一定好雞！」
他不求名牌，只求款式，夠膽死在台灣花五、六千港紙買一件黑色珠片西裝，穿上身立即令人聯想起梅艷芳「在台上我覓理想……」的影像。由於這件西裝十足登台衫，所以主席暫時得物無所用。
保守估計，他衣櫃曾有六、七十套西裝，近年逐步捐出心頭好，現在仍有四、五十套；此外有250條花喱碌領帶，最貴一條千幾蚊，是珍珠鑲V型圖案，十年前購自馬來西亞。
王利民曾經在金融海嘯後，見收入大減順道強迫自己停止買衫，維持半年後突然覺得「唔買嘢點會開心呢？」之後又走去瘋狂購物。直至一天，有同事問起他為何重新購物，他才猛然醒起有過這麼一回事！
不知那裏來的靈感，他最近開始學習「Less is More」，想為自己定下購物規條，每買一件，就要捐或丟兩件，減存貨之餘，亦警惕自己不要狂買。

穿得這麼花，不怕別人誤會是同性戀嗎（雖然王利民已婚，但現今社會的觀念是，有老婆不等於是直）？王利民承認，有位同性戀朋友認定他是未出櫃的同性戀者。惹來gay的疑惑，還夠膽說出來，果真是一位非常主席。

李華華
mailto:[email protected]