全城焦點集中晒喺世界盃，馬會上個禮拜亦安排一個季內罕有嘅周中停火期，鍾意睇波嘅馬迷唔使分心。

雖然冇本地馬跑，但海外賽事就安排嘅轉播英國皇家雅士谷賽期四個賽日，估唔到呢四次賽事反應出奇咁好，喺賭波氣氛最高漲嘅時候，竟然每次平均有成1.5億投注額，而咁多日嘅總投注額有成六億幾。

越洋賽事反應最好係澳港盃賽日，澳門馬始終較為本地馬迷熟悉。今次轉播雅士谷賽期係一個成功試驗，原來係本地馬休息空檔，呢類經典大賽對馬迷都有好大吸引力，有莫雅、蘇銘倫、戴圖理同布宜學等名將，馬迷都有興趣睇同投注。

既然試過有好反應，馬會自然食髓知味，已經決定下年轉播晒整個雅士谷賽期五日賽事，實行原汁原味。

不過，對馬會更大嘅喜訊係，下年會同雅士谷及Totepool合作，開設雅士谷全球匯合彩池，即係英國當地經由呢兩個機構嘅投注，都會全數射晒落馬會設立嘅彩池，匯合彩池嘅規模將會比現時更大。

馬會市場及國際業務拓展執行總監張之杰，近年係馬會發展匯合彩池嘅大旗手，經常周圍飛去同其他博彩機構洽商合作，雅士谷賽期舉行期間佢亦都飛咗過英國，最終又斟掂合作。今次匯合彩池越做越大，就算辛苦少少都值得。

家陣全球各地都有唔少高水準賽事，轉播來港次數則有限制，馬會揀邊啲賽事轉播受注，都幾傷腦筋，最好就梗係揀啲本地馬迷關心嘅賽事。

好似「明月千里」幾日前喺日本跑寶塚紀念賽，好多馬迷事後都問點解馬會冇直播受注。

其實「明月千里」係近期先決定遠征，馬會曾經向民政事務局申請額外轉播寶塚，最終因轉播賽數目滿額而不獲批准。

阿Joe