新奶奶朱咪咪今朝去到南昌邨一間長者中心，跟一班哥哥姐姐提早慶祝中秋，大唱佢哋鍾意金曲同派月餅。

長子馬健庭日前喺黄埔補擺喜酒( 新聞連結： http://bit.ly/2wHXeJ0 )，佢笑指日防夜防家賊難防，事關年初喺演唱會透露大仔結婚一事後，每次出席活動都被追問何時榮升做奶奶，所以咪咪姐事前同啲親友講好，唔好將婚宴相上載到社交平台，點知最後係佢老公第一個放咗上微博，咪咪姐話:「我唔識微博，啲人話加我微訊，我咪話加，都係我老公幫手整，連WhatsApp我都係舊年先學。」

飲完新抱茶，問咪咪姐下一步係咪想快啲抱孫？佢話:「絕對冇，媽咪唔得閒。」咪咪姐話當年生兩個仔時都冇請工人，寧願自己同老公辛苦啲湊，因為交畀工人唔安心，佢笑言凌晨三點收工，到朝早聽到喊聲就自動起身餵奶，雖然咪咪姐話唔急抱孫，但佢都表明唔做個唱，想減輕工作量，問到何時飲埋細仔杯新抱茶？佢笑住話:「有排，佢仲食吓散餐，都有見過佢啲朋友，我有時煲湯都歡迎佢哋嗌朋友返嚟食飯。」