當年今日
關於我們

隔牆有耳:平機會慢手慢腳 - 李八方

蘋果日報 2009/07/11 00:00


平機會主席鄧爾邦啱啱俾立法會帳委會抦完佢欠領導能力,話口未完,估唔到連香港嘅少數族裔都對佢投以不信任票。
一直關注少數族裔問題嘅融樂會總幹事王惠芬同八方講,《種族歧視條例》噚日正式生效,唔少會員一早走上嚟問,點解今日融樂會仲唔去執法。原來佢哋唔知香港有個平機會,更加唔清楚呢條法例係由平機會去處理投訴。
咁好明顯係平機會做得唔夠,搞到少數族裔唔知投訴應該搵邊個。平機會個網頁話《種族歧視條例僱傭實務守則》將會出版中文、英文、烏都語、尼泊爾語、菲律賓語、泰語、印度語同印尼語八個版本,幫助唔同種族人士認識呢條法例。
八方希望平機會快手啲推出呢本守則,唔使班少數族裔想投訴都摸錯門口啦。