林欣彤（Mag）、鄧穎芝、丘凱敏、鄧伊玲同區文詩等今日喺灣仔出席護膚品牌活動，其中Mag話呢排除咗要做新歌宣傳外，又要做舞台劇《我和青天有個秘密》綵排，稍後《老表3》亦快將播映，佢話嚟緊會好忙：「今次要同蔣志光合作，總共要做40場，我就負責20場，排到大約8、9月就公演。」

講到報道指王傑聲稱遭落毒而失聲，曾同樣經歷失聲嘅Mag話：「我冇睇嗰個報道，但自己當時係因為情緒病，導致壓力大而失聲，但o依家已經冇事。」

至於，前排承認有新戀情嘅鄧穎芝，就透露同新男友拍拖幾個月，對方係圈外人，從事飲食工作：「o依家感情幾好，但冇諗住公開，每次公開都冇好結果，唔想俾壓力佢。大家影到就影，但唔會特登拖出嚟。」

佢直言男友自細留學澳洲，起初唔知佢係藝人，雙方已經見過家長：「同屋企人食過吓飯，都讚佢乖仔。同居就應該唔會，大家父母都嚴。」