當年今日
關於我們

【李華華搶先睇】李澤楷高調陪超人去汕大 有玄機?

蘋果日報 2017/06/27 21:17

李嘉誠李澤楷長和李澤鉅李華華

常言道"A picture is worth a thousand words",今日李嘉誠基金會出新聞稿,話畀大家聽「超人」李嘉誠出席咗汕頭大學畢業禮,但重點似乎係超人同佢細仔李澤楷行逛汕大嘅溫馨照片,事關李澤楷以往甚少高調地陪爸爸出席公開活動,唔通超人想將汕大交畀細仔繼續發揚光大?
聽講,今次係李澤楷第三次出席汕大活動,對上一次已經好多年前嘅事。超人係汕大校董會名譽主席(主席係廣東省副省長藍佛安),李澤楷不在校董會內,以李嘉誠基金會董事身份出席活動。
根據新聞稿,超人親自向阿仔介紹汕大各建築、地標、歷史同發展計劃,又喺名為碧玉潭嘅汕大水庫「漫步」,溫情滿瀉,算係難得一見。日前,李澤楷仲跟埋超人去同汕頭市委書記陳良賢開會㖭。
超人明年90歲,大家近年成日問佢幾時退休,上星期又傳佢打算明年退休,轉做顧問,將長和系交畀大仔李澤鉅,可能傳咗咁多年,消息對系內公司股價冇乜影響,公司之後否認傳聞,大家又當冇事發生。不過大家心裏明白,超人總有退休嘅一天,除咗上市王國,佢嘅慈善教育事業都要有接班人,咁啱呢次超人帶埋細仔去汕大,多少令人有啲想法嘅。
掌握財經生活資訊,即Like「蘋果ATM」fb專頁啦!
http://fb.com/appledailyatm
empty
李氏父子漫步汕大水庫