拉麵店味千（538）舊年發現前首席財務官劉家豪穿櫃桶底，仲即時報咗警添，公司噚日再出通告詳述究竟劉家豪偷咗幾多錢，原來佢2012年已經開始「挪用」，直至2018年，每年拎啲，每年拎啲，加埋笠咗2,363萬蚊，仲要每年愈笠愈多，第一年只係拎130萬，舊年就一年拎咗553萬！

其實呢件事反映咗公司好大缺失，因為過百萬資金唔少嘢，提出嚟理應要經過唔少關卡，冇理由咁易拎到，味千就話搵咗獨立顧問公司去睇公司內部監控係咪不足。

雖然劉家豪偷咗唔少錢，但味千業務算唔錯，早兩日發咗盈喜，預計舊年全年可以扭虧為盈，除咗未有錄得公平值虧損、業務穩定、投資收益增長外，華華認為味千可以睇高一線，就係收返劉家豪笠咗嗰2,363萬，隨時變咗特殊收益。