米雪嘅至愛尹志強上周二年初三病逝，為咗完成死者生前希望低調安排喪禮嘅遺願，尹佬嘅至親喺大前日年初七為尹佬低調搞咗個喪禮兼為遺體進行火化儀式。
尹佬家屬呢次搵咗紅磡增福壽殯儀館負責後事，據知過幾日殯儀館職員會去攞番尹佬嘅骨灰，暫放殯儀館供奉，有傳尹佬骨灰將安放志蓮淨苑。
尹佬遺體已化一縷輕煙，噚日仲係伊佬嘅頭七。佢嘅女友米雪同外甥梁漢文（Edmond）因為仍有工作在身，所以佢哋要火速收拾心情開工。

米雪直踩9粒鐘

Edmond喺舅父遺體送去火化嗰朝早，仲要同Big4成員張衞健、許志安同蘇永康為演唱會進行地獄式綵排，咁啱嗰日又係張衞健牛一，眾兄弟除咗送上蛋糕仲唱埋生日歌。
Edmond全程戴住黑超遮掩傷痛神情，佢食完蛋糕就以家事為由提早走咗，事後大家先知佢原來趕住去火葬場。
張衞健、安仔同康仔大讚Edmond處事成熟咗，安仔仲話：「我哋兄弟當然有慰問同鼓勵佢，Edmond喺情緒上處理得好好，任何時候見佢都好正面，冇影響到工作。」
米雪噚日繼續返無綫將軍澳電視廣播城趕拍新劇《女人最痛》，佢噚日嘅通告由下晝3點拍到今日凌晨12點半，要直踩9粒鐘。