新馬季丁冠豪獲發練馬師牌照，最高興可能會係簡炳墀，蓋其三位徒弟葉楚航、徐雨石及丁冠豪先後坐正，而兩位師兄練馬能耐已有事實證明，估計丁冠豪亦差不到那裏去。

簡炳墀從練最煞食係旗下馬襟跑耐拼，以往鐵馬「真威」服役期間共上陣104次，創下香港賽馬紀錄，兩位徒弟從練後亦顯現出這方面的功力。

葉楚航初嘗冠軍練馬師寶座後，換血計劃漸見成效，打開馬匹分廐表看，你會發現接近八成屬質新馬，而「才」系馬共有四駒放在葉廐，季內「良才」、「狀元才」各贏一場，肯定未夠數。

今次（16日）賽事，第七場「良才」選擇重歸直路賽不似減分格，蓋來港前在澳洲所贏的是直路賽，上季剛到埗時亦跑過五場1000米直路賽兩次入Q，轉程絕對有理。

另外，第三場「得賞」就棄直路賽轉跑1200米，睇部署係搏殺格，剛仗初出跑1000米直路賽爆發力不足，明顯輸在路程嫌短，能咬緊再出即加程補中的「魅力星星」過終點，反映質素不錯。

難得潘頓幾乎一手包辨所有操練，以其無寶不落作風，「得賞」大可放心跟進。