當年今日
關於我們

  小小超密謀搞新報紙 - 李八方

蘋果日報 2006/06/09 08:00


自從上星期四李家二少澤楷派神童輝殺上《信報》總壇睇辦呢單嘢唔知點解曝光之後,一如八方所料,呢幾日又一街都係風,要幾精采有幾精采,咁又係時候同大家分享吓!繼林太前日喺自己屋企門口發表「慢慢放手」同埋「一齊管理」嘅言論後,消息人士話再拖落去,小小超寧願掟錢出嚟搞份新報紙,唔一定會娶阿信。就係咁,小小超輕易以點數擊倒林氏兩老。
與此同時,呢幾日仲開始有風話,小小超身邊啲得力助手,正積極喺報界揀蟀,密謀以雙倍人工向各大小報挖角,最低消費講緊成四皮嘢……呢個消息認真醒神!唔係講笑,香港哋查實唔少人恨幫小小超打工,好似噚日咁,now嘅話事人羅燦call咗餐飯,唔知點解係call咗班跟地產新聞嘅記者,而又唔知點解呢班行家會去,唔知係咪大家以為燦哥想借個飯局in人,又或者大家都想去now財經台做主播呢?
講番《信報》,小小超最終能否為自己同林氏兩老個緣份的天空畫出彩虹?可能廣告界都好關心,事關《信報》近來廣告費企得好硬,好似唔憂做咁。

傳真︰2623-9278
電郵︰[email protected]