賭王何鴻燊三房兒子何猷啟，今日凌晨出動慶祝聖誕節，佢約咗成班friend喺中環ArmaniBar開party。

猷啟喺晚上十一點幾，有司機開住架Benz靚車載佢到中環，不過中環附近一帶封路，猷啟要由雪廠街落車，急步跑向遮打道，不過佢到酒吧時，已過咗十二點，所以個樣勁尷尬，要不停同friend耍冧講﹕「唔好意思！」

猷啟除咗同班朋友慶祝聖誕節之外，聽聞仲有其中一個朋友生日，所以成班人飲香檳慶祝。

過咗一個鐘之後，猷啟先行埋單，以為佢請客，原來係幾個男仔夾錢，不過同場女仔就唔使夾，都算有男士風度。

埋完單之後仲有下場，猷啟始終都係後生仔，平安夜點會咁早返屋企，佢提議先去食消夜後再唱卡拉OK直落，走嗰時佢發現畀記者影相，就同其中一個男性朋友轉坐地鐵行先，應該係之後再會合其他朋友玩通宵。