搭地鐵見到政府自願醫保宣傳片，正正反映點解社會越來越多人憎政府。片中女主角跟男主角說「癌症開始年輕化」，我就火到嚟埋！這跟人家開開心心辦彌月酒、百日宴時說「邁向死亡」沒很大分別。死亡人人知，但無人開口講「你仲未死」，埋口講「拜山見」。

宣傳片正正反映政府官員的「靠嚇」思維入心入骨，可以抵賴香港四代人，可能不只四代人，或許中國人本身就存在「靠嚇」基因。不是嗎？小朋友唔食飯，你打他罵他，早前更有短片拍一個外籍人士在兒子面前餵公仔熊，公仔熊唔食飯就被大大力打。好笑？可悲呀，到你老了，你瀨屎瀨尿不能自理，賴死唔去老人院，你兒子就大大力打你。

小至小朋友唔食飯，大至今日抗暴之戰，財政司司長陳茂波都不知多少次「靠嚇」，講過多少次社會動盪打擊香港經濟，甚至搬出「經濟衰退」這些見到都驚的字眼，卻不知怎的，去年12月初他一篇網誌又講「社會風波對香港金融市場影響相對有限」。

為官者抱「靠嚇」管治方針，致令自願醫保變成「靠嚇醫保」。與其說「癌症開始年輕化」，倒不如說：「做人隨時會有咩冬瓜豆腐、斷手斷腳、半身不遂、全身癱瘓、拖累家人一世」來得更加徹底。但，香港人，唔會驚㗎！恐嚇會有短期的反應，但長期使用不單越來越無效，反而衍生出更多反效果。史丹福大學教授Jonathan Freeman曾經做過一個研究，在房內放置機械人，然後恐嚇房內小朋友「一陣我離開間房，邊個觸摸機械人，我就打斷你隻腳」，小朋友聽到都驚，結果無人敢碰機械人。事隔6周，同一班小朋友入房，見到機械人在房，而教授不在房，於是有77%小朋友摸機械人。

今時今日講正向思維，假設唔食飯的小朋友羨慕大哥哥打藍球入樽好型，那就引導他：「你食飯，均衡飲食，快高長大，將來就入到樽」。推銷自願醫保，唔使靠嚇，講番有稅務優惠，講番真相就是香港醫療負擔越來越沉重，政府再揹唔起條數，香港，大家土生土長的地方，人人畀番自己醫藥費，開誠佈公，香港人比較接受。

林雨菲
https://www.facebook.com/lamyufei520

---------------------
職場新手靠MPF可退休？
股榮 X 積金局陳安定
親身傳授「百萬MPF」煉成術
點擊參加【MPF BB班】FAN享會
-----------------------
屬於香港人的移民攻略
立即登入【全球樓行】

Dream House零距離