黎瑞恩（小恩子）同雷頌德（Mark）老婆梁家玉喺facebook直播玩煮飯仔，小恩子煮撚手台式滷肉飯，Mark嫂就炮製韓式人蔘雞湯，大鬥廚藝。

小恩子被Mark嫂踢爆試過買200蚊豬肉整滷肉飯，非常豪氣，小恩子解釋：「因為每次整滷肉飯，個個朋友都話要食，唔買咁多，唔夠分㗎。」小恩子仲話一定要用台灣嘅醬油調味。

而之前教大家煮意粉要過冷河嘅Mark嫂，今次就教大家整雞湯要先將雞出水，仲要係用凍水落雞：「我唔係用熱水出水。」小恩子都話：「咁得意。」Mark嫂解釋：「因為熱水落，中間嘅血水好難走出嚟，以前學廚時教嘅。」

其間小恩子仲變身助手幫Mark嫂切薑，點知被Mark嫂發現佢切餸手勢錯晒，忍不住捉住小恩子隻手教佢切薑，取笑小恩子：「好懷疑你平時應該係由傭人姐姐負責切嘢。」不過，Mark試食完小恩子嘅滷肉飯，都大讚好味道。

更多娛聞，喺晒《娛果》
http://fb.com/appledailyent