當年今日
關於我們

隔牆有耳:
森巴足球喺立會贏晒 - 李八方

蘋果日報 2014/06/13 00:00


巴西球迷今日應該個個一對熊貓眼,事關由巴西對克羅地亞嘅世界盃揭幕戰喺凌晨上演,見報之時已經有結果。一班立法會波牛幾乎全部係巴西躉,個個都話要捱夜觀賽,相信立法會今日都會驚現唔少熊貓,隨時會為巴西報捷忘形大跳森巴舞㖭。
識踢波,一定要識林大輝。縱橫球壇多年兼做過甲組球隊班主嘅大輝,睇好巴西隊今年攻守兼備、有前有後,唔會淨係得個人技術而冇晒隊形,尤其有啲球員好似後衞馬些路喺歐洲球隊皇馬效力,熟悉對方踢法,知己知彼,再者巴西隊有個好教練史高拉利,加上主場嘅天時地利,深信巴西冇得輸。佢個人仲睇好巴西前鋒尼馬喺今屆贏盡球迷歡心,話做乜都係最緊要有「觀眾緣」,睇吓狼班子就知啦,呢句八方講嘅!
立法會巴西狂熱仲有白鴿黨胡志偉,佢自細好迷巴西球王比利。今年佢始終如一熱捧巴西奪冠,但大嘆未必成日睇到賽事,同時亦自我叮囑睇波要戒食薯片同飲啤酒,以免有世界盃後遺症:忽然暴肥。
工聯會郭偉強獨愛荷蘭橙
民建聯陳克勤都係巴西迷,話呢個足球王國歷年喺世界盃嘅表現都唔差,但總係欠缺一啲運,希望今次有主場之利,有望喺自己地頭攞盃威威。
同樣係立法會足球隊成員嘅工聯會郭偉強就係異數。雖然佢話冇乜奪冠心水,但都笑笑口話對荷蘭隊較有情意結:「因為件波衫比較靚,係橙色。」橙色咪係工聯會嘅會色?估唔到佢連睇波都咁政治正確。
李八方

mailto:[email protected]
識睇 一定睇蘋果嘅足動世盃:
http://worldcup2014.appledaily.com/