今晚梁烈唯去九展欣賞林希樺(Elsa)個talkshow，笑下令心情都輕鬆啲。呢個騷由Bob林盛斌投資，所以好友李思欣兩公婆都來捧場。鮑姐鮑起靜都有嚟，原來佢係Elsa阿姨。

見到鮑姐，當然要問佢會否考慮返去易主嘅亞視？鮑姐話:「睇下有冇可能啦，有需要我都會支持嘅。」但新股東有紅色背景，資金來源亦不明，可擔心製作不合港人口味？鮑姐就好老定咁話:「唔使擔心啦，搞製作唔係佢哋，係我哋。」

鮑姐對亞視感情極深，同樣效力亞視多年嘅朱慧珊，因為新節目《門門見珊》變《開門見閂》心淡下離巢。那鮑姐可感到可惜？鮑姐一臉愕然謂:「下？」

之後鮑姐再謂:「不過佢係一個特別有心嘅人，其實冇乜必要留喺亞視，因為佢有一個幸福家庭同錫佢嘅老公，佢都係仗義心腸支持亞視，依家都係時候退隱，俾後生去做喇。」

另外呢，之前有傳Bob因為喺新片《沒女神探》表現出色，導演想幫佢開部《獨L神探》俾佢做主角，呼應番佢嗰句「一日毒L，一世毒L」。Bob聞言即笑道:「係咩？有講過咩？」再話:「不過之前有聽講過喎。」仲提議搵埋張建聲同鄭敬基，話佢哋先係毒L喎。

《沒女》8日票房收400萬，成績不錯，而且Bob嘅毒L演出，就連前輩都激賞，同佢講話可以提名金像獎最佳男配角，亦有人話佢嘅演出比得上王菀之《金雞》系列，叫佢做定西裝就差唔多。Bob笑言:「如果係真，咁人生就好美滿喇。」問佢有冇諗過開戲捧自己做主角？佢即謂:「冇諗過，捧自己好奇怪，如果有大老闆投資，自己佔細細份就得。」