【潛質優厚】田草長直路啱佢爆 蘇保羅「閃電俠」仲有排贏
蘋果日報 2019/07/25 08:30
閃電俠蘇保羅美麗小島田草長直路
閃電俠上季尾贏馬姿態出色
蘇保羅馬房上季自購新馬「閃電俠」，出自父系「美麗小島」，本身血統早熟有速度，而且演出可持續穩定。
近年「美麗小島」在港較出色子嗣包括「爭分奪秒」、「勝得精彩」等，都係好開就好，相信「閃電俠」亦可遺傳到呢個優點。
「閃電俠」自從去年8月落地，9月開始做工夫，先後試咗五次大閘，仍未安排上陣，馬房似乎唔想過份催谷，希望循序漸進地可將馬匹狀態提升。
直到今年3月初出爭四班田草1200米，「閃電俠」賽前以32倍冷門身份被睇淡，在沿途居後情況下，末段竟以全場最快時間22秒45後上入Q，走勢洶湧，初出即展示本身強勁加速力。
「閃電俠」之後於4月因發燒退出及缺課一星期影響進度，5月復出同程冇表現未可作準，到6月有足夠準備兼換上潘頓再爭同程，沿途守好位下，已可從容地以三個多馬位大勝對手，並做出快時間1分8秒96打開勝利之門。
「閃電俠」於沙田長直路更合發揮其強勁爆發力，場地性能又廣泛，早熟馬今季應可長期留意。