狼振英噚日出席立法會答問大會時長篇大論,加埋悶到震的說話音調,不但保皇派議員頂佢唔順,連佢個「大腦」、中策組首席顧問邵善波都進入休眠狀態,開會頭半個鐘,已同行會召集人林煥光、行會成員鄭耀棠頻頻釣魚。
難得有位教育局長吳得掂開會期間鬼咁精神,原來佢猛用手機贒實股市上落,醜態俾人拍低斷正,會後即俾大批記者追問係咪睇股票。阿局長口窒窒咁話:「我唔係,我通常呢,開會之前呢,都會睇睇最新嘅news,一啲特別嘅香港嘅知識。」問到佢係咪用彭博(Bloomberg)電話App睇股票,局長話:「我都唔知,我睇咗好多唔同嘅pages。」當記者攞幅撮圖畀佢睇求證時,局長就猛話「唔係呢個」,快閃離開立法會。