母親節，每年5月第二個星期日，為歌頌母愛的大日子，酒樓例必座無虛席，身為人母嘅，個個手執一束鮮花，份外明艷照人。
權威人士，不定期在官媒《人民日報》出現，日前發表文章，指內地經濟運行，不可能是U型，更不可能是V型，將是L型走勢，淡得不能再淡。
還記得年初內地股滙大波動嗎？人民幣突然貶值，以國際大鱷索羅斯為首嘅大戶，瘋狂唱淡中國，認為硬着陸在所難免，更大手沽空亞洲貨幣。風雨飄搖之時，《人民日報》立即挺身而出，連環發文反擊，重申內地經濟穩如泰山，指名道姓索羅斯挑戰人仔不可能成功，最後人仔在有形之手力托下，亦重回正軌。

慈母上身　先保護再教訓

市場普遍認為，權威人士觀點，其實即係習近平的想法。「年初《人民日報》先至話形勢一片大好，點解𠵱家轉軚唱淡？唔通真係惡化得咁快？」試想想，你個寶貝仔寶貝女返學俾其他同學蝦，你作為母親嘅會點做？梗係第一時間保護佢先啦，就算佢有錯在先，你都會幫佢認錯，然後回家再教訓佢。將呢個例子套用喺阿爺突然轉口風，你就明白佢嘅苦心，慈母名銜當之無愧。
講番權威人士，佢話內地經濟係L型，係咪太悲觀？我聽落反而覺得安慰，無他，L型即係意味去到一個低點，就會橫行，唔係一直往下沉。大家最關心嘅GDP增長，由以往保八、保七，到𠵱家區間運行，反映增長放緩應已屆尾聲。從另一個角度出發，年年keep住有增長，你仲想點？
大市陰晴不定，星期二以為見底，噚日又沽多你一棍，夾硬要搵嘢買，一定要防守性夠高。今日推介REITs泓富（808），防守意識勁過德國隊後衛，無他，雖然股價持續破頂，但息率依然有近6厘，每股NAV達4.98元，trade緊0.6倍PB，睇見都流口水。
泓富主攻商廈，物業分佈在九龍東、紅磡等，出租率一直保持在95%以上。九龍東乃新一代商廈重地，租值肯定有保證；紅磡最近又有多幢商廈易手，有利推高估值。未來亮點嘛，今年集團整體續租物比例達35%，意味又可以加租，谷高盈利，負債比率僅得27.2%，距離上限45%幾條街，大把彈藥做併購，連攻擊力都有埋，後市孰升孰跌，都唔會影響到佢嘅尋頂之旅囉。

割柑人
本欄逢周四刊出