莫文蔚(Karen)今日喺銅鑼灣出席其首個攝影作品展覽香港站揭幕禮，展出佢之前同老公環球旅遊3個月拍下嘅相片，當中景點包括玻利維亞、大溪地、復活節島等等。Karen話：「影咗過萬張相，㨂百幾張出嚟，真係揀到癲。」會唔會出影集？Karen指佢哋兩公婆已經有一本，今次亦有出postcard，其實都可以出相集，不過工程好大，搞得嚟又到我要開下一站巡迴。」

現時正進行巡迴演唱會嘅Karen，佢透露剛傾好明年喺西班牙同意大利巡迴演出，仲話：「好開心可以喺有幾百年歷史嘅歌劇院演出，到時可能唱下歌劇，唱啲高格調嘅歌，我有首歌係同意大利男高音合唱，希望可以請到佢嚟。」雖然忙巡迴，但好彩聖誕節有假放，可以陪下老公。

對於關之琳今日喺台灣出席活動時，驚爆同台灣富商陳泰銘離婚，Karen聽到O晒嘴話：「佢結咗婚咩？（覺得好驚訝？）娛樂圈成日都有好多surprise，結婚係好私隱，你可以選擇講同唔講。」