為宮崎駿電影《天空之城》、《龍貓》、《魔女宅急便》唱出多首歌曲嘅日本女歌手井上杏美，今日偕11歲大囡囡Yu-Yu抵港，為一連兩日假尖沙咀海港城嘅商場騷演出。

香港DonguriRepublic為慶祝LCX店3周年，特別邀請井上杏美以母女檔來港表演，順便慶祝父親節。原來井上杏美早喺20年前曾經來港，佢話闊別多年，覺得香港變了很多，仲大讚連街上嘅阿叔、阿嬸都好識打扮，今次佢想趁機會去吓旺角女人街同埋睇維港夜景。

談到保養靚聲，井上杏美話自己平時會勤洗手及嗽口，避免傷風，同時又會食鍾意嘅食物，盡量保持住心情舒暢來減低外來壓力。

至於年紀輕輕已入行嘅Yu-Yu，由於3歲時患上白血病，當時多得媽咪歌聲打氣，令Yu-Yu嘅生活更加離唔開音樂，喺吉卜力動畫角色中，最愛小龍貓及中龍貓。問到有冇發展目標？Yu-Yu話希望可以做個全能歌手，好似模而優則唱嘅西內瑪利亞咁喎！