但有網民好心水清,話五月天喺反服貿事件立場舉旗不定,話唔定會為人民幣跪低呢。五月天演唱會主辦機構特高娛樂製作有限公司宣傳經理梁先生同八方講,今年已經係五月天來港演出第10周年,諗住同某慈善團體合作籌款,強調個唱係私人演唱會,同政治冇任何關係,「完全唔關事,政府冇聯絡過我哋,如果政府搵慈善機構合作我哋都歡迎,但唔想拉上任何政治關係,演唱會令社會和諧舒緩情緒冇所謂,但唔會係政治立場出發」,換言之都唔係嚟出席維穩騷啦!
八方亦問過五月天經理人,佢話五月天往年都喺紅館開騷,今年申請唔到紅館檔期只好另覓場地:「場地問題很麻煩,想過戶外唱,正在選擇,但香港5月多雨,歌迷覺得不太適合。」並話已做最壞打算,萬一場地遲遲未確定可能停辦㖭呀!民政事務總署只回覆八方,話跟進緊五月天來港演唱一事。