一連7場的林海峰Talk Show《林海峰是但噏Happy Monday》，今晚在紅館舉行，開騷播片時，觀眾亦不停叫「光復香港 時代革命 五大訴求 缺一不可」，在棟篤笑中，林海峰也有隱喻香港現時的社會狀況：「我哋呢啲廢中成日都話欠咗啲年青人，但我哋係有欠冇還，所以咪誠信破產，我哋成日話我哋做過後生我哋知，但我哋點會知呢？當我做後生嗰陣拖手最多拖兩隻，我見而家啲後生拖手係拖條鏈出嚟。你做後生嗰時暑假點過？你後生咪四大天王，今日嘅後生係五大訴求，所以唔好再講年青人係社會未來嘅棟樑，年青唔係未來啊，係現在啊，講呢句說話嘅人已經係過去喇，咪就係一班棟樑，由過去棟到現在希望棟到將來，搞到大家一棟都冇，咁年青人邊有未來啊？問題係啲未來棟樑棟咗喺邊？佢哋棟咗喺監倉度，法律學者、大學教授、議員、社工、大學生，棟咗喺監倉度。」

林海峰更用年輕時的家庭問題，隱喻香港現時的社會狀況：「細個同細佬打交，阿媽就話唔好嘈，兩個都打，打到藤條都爛埋，之後唔知我定係細佬講話要登報脫離母子關係，之後我媽話你試下吖，之後去咗煮飯，嗰時我小學咋，我字都唔識多隻啊！好彩冇咋，點解啊？因為咁啱隔籬屋有兩個仔，又咁啱姓林，有一日佢兩個又係打交，然後林師奶就：『你兩個唔好嘈，你做咩搵嘢掉佢呢？你又做咩用支棍打佢呢？剩係打你一個，你乖，請你食雪糕。』咁之後咪再打得勁啲，打到家變。如果今日登報我會咁講，本人林海峰及細佬曉峰，感謝我媽以公平、公正、公開嘅方式處理我兩兄弟，絕無大細超，不孝子上！」

林海峰講到大家做好多事即使面對辛苦都會做，因為金錢是所有問題的答案，他說：「而家咁多人叫『加油』係咪收咗錢？呢個同錢冇關，同以前真係變咗，以前香港人個個叫『炒樓』，而家叫『加油』，香港人真係變咗，畀番以前香港，叫『香港人炒樓』，『香港人炒樓』，係唔同今日叫『香港人加油』，佢哋咁叫『香港人加油』係因為香港人熱愛香港地。」全場觀眾拍掌。林海峰再說：「叫『香港人炒樓』係賺住嗌，你叫『香港人加油』係蝕住都叫落去。」然後全場無間斷叫『香港人加油』，林海峰說：「呢啲人(指觀眾)唔係收咗錢，佢哋係畀咗錢入嚟嗌，香港人變咗，得我一個係收咗錢。」觀眾再不停大叫「香港人加油」，林海峰搞笑說：「叫到我罰錢你哋開心，自由比金錢更重要。」

採訪、攝影：曹家誠、王連連

-----------------------------
【撐學生】
召集有心人 撐學生全年睇《蘋果》
立即按此
-----------------------------
《囚牢之疆》 專頁
揭開集中營邪惡面紗
今日新疆 明日香港