日本長腿女星菜菜緒近日上節目受訪，自爆圈中其實冇乜朋友，放假只會留喺屋企過，佢透露同變性藝人佐藤佳代識於微時，大家細細個已經認識，仲喺節目公開5歲時嘅童年合照，當時菜菜緒仲係單眼皮，而佐藤佳代仲係男兒身，菜菜緒同佐藤佳代可謂睇住對方越變越靚。

有「變性連詩雅」之稱嘅佐藤佳代，擁有可愛樣貌冧掂東洋宅男，上年登上成人雜誌《週刊Playboy》拍攝性感寫真，令佢吸納更多粉絲支持。佐藤佳代喺圈中有唔少好姐妹，當中包括AKB48成員小嶋陽菜、峯岸南同埋舊將大島優子，而佢同菜菜緒13年後竟然做埋同行，都咪話唔有緣。

佐藤佳代由男變女，查實菜菜緒都變化好大，佢出晒名係圈中嘅人工美女，而睇佢童年照，發現同現在的確好大出入，咁佢有冇整容相信都心裡有數！菜菜緒仲講過，可能自己生得比較多大，不時會有人以為佢係變性人，其實同佐藤佳代拍埋一齊，又真係幾難分得出邊個係變性人嘅~