【銅鑼灣】現年40歲嘅黎瑞恩最近同結婚11年嘅金利來三少曾智明搞離婚，為咗唔好俾人睇死佢係貪錢嘅女人，有指小恩子嫁入曾家多年來都冇物業揸手，𠵱家同一對仔女搬走，都唔選擇入住曾家旗下物業，寧願以月租三萬蚊住喺沙田凱悅酒店，方便喺沙田區返學嘅仔女。
雖然豪門夢碎，但表面睇闊太生活不變，因為小恩子得到一對仔女嘅撫養權，有傳小恩子獲發每月20萬個人使費，子女教育同生活費另計。前日下晝12點，小恩子一身黑衣襯紅黃藍色間條裙，薄施脂粉一個人離開酒店，揸住平日用嚟代步嘅豐田Jeep，直駛銅鑼灣皇冠酒店約朋友嘆茶。

唔知係咪呢排是非太多，一時傳小恩子同有婦之夫、隱形富商鄭應南交往，一時又話佢同好姊妹車婉婉反面，所以前日佢專登book咗間中菜廳房同朋友傾心事紓解煩憂。小恩子同朋友由下午1點食飯、傾偈直到5點幾先離開，足足四個鐘頭，其間一直拉上窗簾，直到差唔多埋單走人先再開番，但見小恩子不停行開同人講電話，似乎好忙。小恩子去代客泊車處攞番架車，之後返去暫居嘅沙田凱悅酒店。
採訪、攝影：徐綿、潘冠恩、黃曉程、羅德光