當年今日
關於我們

【短片】【周末動人】港產WhatsCap老闆:年輕人係最重要資產

蘋果日報 2014/12/20 06:00

周末動人

「呢把刀,我到全世界都帶喺身上。」由愛食「榴槤乜乜乜」的反佔領人士,到配上絕核歌詞的劉江華大頭照,一場雨傘運動,世代鴻溝浮面,也令一鍵分享到社交網站的二次創作式撮圖,成為戲謔表態的人氣工具。專門開發手機程式(Apps)的IT人黃明威,笑言小本開發,源自九十後同事的妙想天開,「有人話怕年輕人,但喺呢度,佢哋肯定係重要資產」。正計劃將人氣撮圖App帶進寶島的他說。

記者:呂麗嬋攝影:何家達

走進Mtel(八達網)的辦公室,像走進大學校園。「公司120人,我係最老嗰批頭三甲」。說這話的,是行年38的行政總裁黃明威(Willy)。1999年成立的Mtel,是第一代手機應用程式開發商,也是首間靠Apps業務成功上市的公司。

由早年與電訊公司合作研發增值服務,到iPhone出現,自家開發原創Apps,經歷行業變化。新推出的WhatsCap,就食正「人人用圖表態」的Z世代溝通模式,累積下載人數逾百萬,連續八週高踞免費下載榜首位,堪稱本地手機程式之王。

大受歡迎,但Willy笑言,開發程式最初純屬玩票,「緣起facebook有個cap圖王,專capTVB劇對白,有個同事衝入嚟同我講,話要先儲圖喺手機,好麻煩,點解唔索性搞個Apps?」新一代Apps,由實用資訊到手機遊戲,五花八門,結合社交媒體,卻是新嘗試,「開會拋個idea出嚟,睇吓有無人會用。咩App都好,有人用先有存在價值」。殊不知,小小的會議室內,竟是一呼百應。Z世代的溝通模式,七十後的他笑言也被考起,要得請教公司內的年輕人。

就是Apps的內容,也見世代鴻溝,「我嗰年代,最經典一定係周星馳!」三字頭新中年,由《國產零零漆》的「攞你命三千」,到《少林足球》的「做人如果無夢想,同條鹹魚有咩分別?」一見到就識笑。

Z世代呢?則是「膠劇」或「神劇」對白;另如雨傘運動,也造就大量時事「金句」,由「四點鐘許sir」的「在地球任何地方都是不能接受的」,到CY口中「是可忍,孰不可忍」,同樣大受歡迎,成為網上二次創作的流行材料。

「呢啲,真係要靠年輕人,我都跟唔貼」。Willy很老實。WhatsCap內的2萬張cap圖,分門別類,主要由網民上載,收入來源靠植入式廣告。一盤生意,看似「本小利大」,但Willy謂在政治困獸鬥旋渦下,就算只提供平台,也得步步為營,「同一張撮圖,有人覺得好笑,有人見到好嬲,試過放上去,同一時間收到好多投訴」。

一個平台,究竟保持政治中立,還是要有自己立場?就算是對粗口的接納程度,一樣大不同,「唯有加入選項,由用家自己選擇」。

摸著石頭過河,遇上自己不認識的,這個老行尊自言一樣要虛心學習。「時代唔同,就算我係老闆,都唔可以一言堂,開會時寧願投票解決。」行業重創意,年輕人是重要資產,Willy謂雖也曾因年輕下屬「朝早起唔到身」、「一言不合鬧辭職」而大表氣結,但直言很珍惜年輕新力軍,「一間公司要發展,無可能自己做晒,唯有溝通多啲,唔好大石責死蟹」。

「我成日講,唔好當幫我打工,研發Apps嘅好處係,每個人都係準用家,覺得有興趣有用先提出,一手一腳去做,由市場決定得唔得。」就如他,因為打邊爐時被女友「老點」買戲票,設計了讓他在IT界奪獎無數的「電影速遞」App;又因為甜蜜觀星卻弄不清東南西北,與太空館合作,推出附GPS的「星夜行」手機應用程式。橋王的穚,並不神奇,統統源自生活。

「呢行唔同食肆,有兩味招牌菜就無敵,市場變得好快,好多時來不及R&D,已係明日黃花。傳媒愛報導一朝發達嘅例子,其實更多嘅,係喺市場只曇花一現,無辦法生存落去嘅IT公司。就如WhatsCap,起步受歡迎,一樣要不時加入新元素,先會襟玩。」由十人公司發展至百人團隊,這個橋王,不信神話,比你我都要清醒。

唔做差人做IT人

蘋果AppStore上有過百萬款應用程式,去年營業額高達780億元,表面看似商機無限,但競爭極激烈。業內有調查就指出,除了棋牌類遊戲,手機遊戲的生命週期一般只有3至6個月,受歡迎如CandyCrush及DrawSomething,一樣難逃活躍用戶數目「插水」命運。黃明威直言,iPhone面世,Apps無人不識,IT界幾多公司夢想靠它發圍,但成功者卻是鳳毛麟角。

1998年回流香港,加拿大滑鐵盧大學數學系畢業的他,笑說當年誤打誤撞入行,「嗰時無咩目標,鍾意運動,諗住考督察,貪起身點有二萬八千幾,等緊面試期間,有朋友問我有無興趣做業務發展,但要先去新加坡受訓。我聽見可以去新加坡,就一口答應,點知愈做愈有興趣,我好鍾意接觸新嘢,呢一行每日都有新變化,好啱我」。

人生就如畫鬼腳,當年,若不是誤打誤撞入了IT行業,今日在佔領區,我們遇到的,怕且是勇武的黃SIR,而不是IT達人Willy吧?