【新增動新聞】
周三亞冠盃八強次回合，終於上演絕地反擊成功嘅戲碼。浦和紅鑽主場4:1反勝大半場打少個嘅川崎前鋒，合計反勝5:4晉級，殺入四強鬥上海上港。

首回合贏3:1嘅前鋒，19分鐘已經由艾辛奴費拉拿開紀錄，諗住坐定粒六啦，點知35分鐘興梠慎三追平，三分鐘後後衛車屋紳太郎因為舉腳過高踩到對手塊臉領紅。守到完場前廿分鐘，前鋒終於頂唔順，紅鑽由後備入替嘅隆比真歷、拿費爾達施華同埋高木俊幸分別喺70、84同85分鐘各入一球，喺全場多達26次射門下反勝出線。