睇《蘋果》知道富家子黃英豪（黃英琦細佬，老牌律師黃乾亨之子）向另一位富家子梁紹鴻（前怡和買辦梁顯利之子）追討二百萬美元。理由係一九九一年後者代前者投資外滙輸晒，疑違反若干協議，大家睇番《蘋果》就知道詳情。
呢單事件都幾騎呢，十四年前之損失，點解拖到今日先至追討？外人難以明白。同是損失幾百至千幾萬港元之方潤華與郭炳江，就當係喺街邊跌咗幾毫子，唔再理會。我哋不論誰對誰錯，是是非非與我哋無關，只係慨嘆一句，出身門第十分緊要，平民子弟恨都恨唔嚟。

賓架陳出身之時，好彩入到美資銀行之中嘅西部銀行，冇人介意佢住響邊。記得ＪＰ摩根（未與大通合併前之舊摩根）嚟香港開分行，因係美國東部貴族級銀行，賓架陳有幾位同學兼同行想話申請，後來收到貼士，最好係住響羅便臣道、干德道或相等街道，就會有多啲面試機會，於是大家惟有認命，因為大家身體內部冇藍血也。
賓架陳其中一位同事Ｈ後來去咗做私人投資基金，基金最重要之事就係第一投資有成績，第二係搵闊佬出錢買基金單位（即集資），集資對象首選當然係大家族啦。同事Ｈ與老闆行到腳跛，講到口水乾，都冇香港大家族肯制，卒之要搵美資大證券行幫手，走去美國集資，哈，美國啲退休金基金又幾爽手，同事Ｈ間公司幾容易就籌集幾千萬美元，以香港為基地，大展拳腳。
香港闊佬唔信同事Ｈ間公司及班專業人士，皆因佢哋只靠功績，全無背景。同事Ｈ間公司後來請咗一位二十零歲青年，叫佢去幫手成立對沖基金，呢位青年真把炮，嗱嗱聲就代基金集資數百萬美元，問佢點解搵錢搵得咁易，佢話：「班人同我喺鄉村俱樂部自細玩到大嘅！」好彩佢冇輸晒人哋嘅錢啫。