李日朗（Don）今日到商台接受訪問，講到早前自編自導自演嘅電影《特區》，喺《第二屆中韓國際電影節》上獲新導演獎，佢話：「攞獎興奮嘅心情維持咗一個禮拜，之後就返回現實繼續工作。」又話其實冇諗過得獎：「只可以話韓國人鍾意睇呢類型題材，之後有電影公司搵我傾改編小說拍戲，o依家洽談中。」

得獎後身價有冇上調？Don笑言：「可以調整吓，價錢對我嚟講都唔係咁重要，最重要係拍到鍾意嘅嘢。」正為另一套執導嘅功夫片做後期嘅佢，以後會唔會再以眾籌方式集資？佢話唔會：「成件事好虛擬，眾籌喺外國係一個文化，流行咗一段時間，但喺香港就真係需要時間去運作。」

早前曾開記招稱被女拍檔呃咗二百幾萬「老婆本」，Don話已交警察跟進，自己每日都帶住希望等消息：「希望警察能幫到手，好多謝身邊朋友幫手，一有嘢做就搵我，之前過半退隱生活，最近都出咗嚟好多次，所以係OK嘅。」

精選娛聞，喺晒《娛果》
http://fb.com/appledailyent