話咁快歐冠盃正式賽事又喺周二開始，其中香港球迷可以免費喺電視睇到嘅其中一場直播，就係蘇超聯球隊些路迪主場對西甲聯勁旅巴塞隆拿；就算兩隊陣前都有傷兵，呢場大波都算係萬眾期待。
由於兩支球隊都崇尚進攻足球，而些路迪喺主場踢歐洲賽又特醒，拉近咗同星光熠熠巴塞隆拿嘅距離，呢場波重係巴塞嘅瑞典前鋒拿臣回歸些路迪嘅首仗，認真有睇頭。不過，經過上星期六嘅賽事，就兩軍都添傷兵。些路迪除咗有中堅華加受傷，前鋒瑟頓嘅鼠蹊傷亦未好番，未必趕及喺星期二上陣，同前拍檔拿臣鬥過。
巴塞方面，就有巴西中場莫達喺對西維爾時勇戰受傷，左膝兩條韌帶都斷裂，起碼要唞六個月。雖然莫達唔算出名，但其實自從高古同戴維斯離隊之後，佢就幾乎係巴塞唯一可以踢防守中場嘅球員，唔怪得連巴塞教練列卡特賽後都話頭痛。

又憑問題球迫和曼聯有運咪睇小
過去成日對曼聯入波嘅路倫，前晚又幫保頓省入對方大門。呢場波曼聯都算執番身彩，臨完場扳平，但入波前貝利安有犯規之嫌。呢次係曼聯今季第三次因問題球（和愛華頓○比○，施維斯達犯手球無被吹；和布力般一比一，阿倫史密夫入波前沙夏犯手球）。曼聯咁有運，點敢睇小？

場邊挖鼻懶理衞生基爾禾新帥冇儀態
睇完前晚基爾禾對國際米蘭場波後，我求大俠對基爾禾新帥巴利達留下深刻印象，理由並非佢首次領軍就對國米搶到分，而係俾攝影機捕捉到佢兩度挖鼻，幾唔衞生。睇得一場波，好難咁快評估佢領軍能力同前教練迪尼利有無得比，但儀態就肯定唔及成個學者咁款嘅迪尼利嘞。