呢排對特區政府嘅首要重任，梗係要令廣深港高鐵香港段如期23日暢順通車，所以娥班子都瞓身全面力谷，身在廣州嘅特首林鄭月娥出席泛珠合作論壇致辭時，亦都不忘hardsell，話自己噚晚由紅磡搭城際直通車到廣州用咗兩粒鐘，但18日後廣深港高鐵香港段開通，香港西九龍直達廣州南站只需47分鐘，大大拉近兩個城市距離，又話喺香港西九站直達嘅44個車站中，37個喺泛珠省區內，邀請泛珠區域嘅朋友，搵個機會早啲坐高鐵去香港走走看看喎。

除咗高鐵，少不免都要講大灣區，林鄭話港府正推進大灣區建設，重點工作包括打造大灣區成為國際科技創新中心、便利香港優勢產業落戶，並透過政策創新同突破，加強香港同大灣區以至泛珠區域嘅互聯互通。佢話上月國家出台畀港澳台居民申領居住証嘅辦法，回應咗港人多年訴求，亦可促進大灣區建設，輻射帶動泛珠區域發展。