自從Dove十幾年前以「RealBeautyCampaign」一炮而紅，唔再sell產品而轉向sell價值觀和態度，成為廣告界建立品牌形象的極佳例子。

SKII去年亦都推出「ChangeDestiny」一系列廣告，邀請了不少城中女性如湯唯日本女星綾瀨遙等發表「改寫命運宣言」，廣告唔再賣產品，改為賣一個價值觀。

單單賣明星當然唔夠貼地，上周SKII就推出了一個以中國剩女為題材的短片，請了幾個國內達適婚年齡的單身女性，齊訴剩女心聲，廣告5日於優酷已錄得202.4萬播放；微博轉發逾2.5萬次；Youtube亦有134萬點播。

短片題為「她最後去了相親角」，記錄幾位內地單身女士遇到的困擾和壓力，當中涉及到內地家長強硬迫婚的態度，短片尾段有揭竿起義的味道，號召獨立女性去改寫自己命運，迎合SKII推崇的「ChangeDestiny」概念，整個短片只在最後出現SKII的品牌名稱，並無提及任何產品。

至於網民點睇呢？評語就好壞參半啦，有網民在短片下留言：「已經說服不了我了，從頭到尾一直強調『剩女』，這個字眼本來都被淡忘的歧視色彩字眼，『剩女也光榮』想說明什麼，還是承認了『剩』。」另外亦有網民大讚拍得好感人，品牌定位出晒黎。

掌握財經生活資訊，即Like「蘋果ATM」fb專頁啦！
http://fb.com/appledailyatm