車仔贏波功臣同偶像合照 風騷「阿姨」寸爆DC
車路士歐聯費蘭度托利斯馬德里體育會迪亞高哥斯達巴舒亞伊
巴舒亞伊星期三後備上陣並且補時射入絕殺入波,協助車路士作客以2:1反勝馬德里體育會,賽後呢位車仔贏波功臣仲同咗兩位踢過車路士嘅球星費蘭度托利斯同啱啱重返馬體嘅迪亞高哥斯達(DC)合照,但佢就乘機搵DC嚟開玩笑。
下個月24歲嘅巴舒亞伊喺個人Instagram鋪咗張同費托以及DC嘅合照,佢寫住話「好榮幸可以見到其中一位好偉大嘅前鋒,我細個嘅時候已經睇佢比賽……而我講緊嘅並唔係迪亞高」,hashtag仲叫大家估吓今晚邊個偷咗佢件波衫,好明顯想話畀人知佢交換到費托嘅波衫啦。
DC日前啱啱正式由車仔重返馬體會,但要到明年1月先至可以為球隊上陣,至於馬體會出身嘅費托其後踢過利物浦,之後再轉會車仔但表現不似預期,結果被外借到AC米蘭,而喺A米啱啱將佢正式羅致,2015/16球季馬體會又借用返費托,上季佢再正式回歸母會。