大年初一，特首大利是價值幾多？答案就係：「999.9」純金─（朱古力）嘞。昨日阿董去到粉嶺圍村同新界原居民拜年，見大人細路都大派利是，八方初時見佢準備咗兩大籃利是係咁派，重以為今次佢實大出血，但睇真啲，原來淨係一塊朱古力金幣。
不過，攞到特首利是嘅細路都冇因為冇錢落袋而失望，反而好多人一搶到手就即拆即食，轉頭又再伸手攞過，樂此不疲。阿董都好樂意親近小孩，一見得意啲嘅細路就話：「畀我抱吓佢啦！」重玩高難度動作，舉高個BBFing吓Fing吓。
跟老董拜年先知道，原來圍村有好多禁忌，阿董屬老一輩人當然識得避忌，但八方就親眼見一個記者同一個新聞官差啲激嬲原居民。話說阿董走咗之後，幾個記者企喺祠堂門口訪問村民，其中一位好自然咁一隻腳踏住門檻，就即時俾村民話「我哋門檻唔踩得！」原來喺圍村習俗，踏住祠堂門檻係意味住挑釁。點知一分鐘後，又有一位新聞官不知就裏跳咗上門檻，今次重係雙腳一齊。嗰位村民終於忍唔住有啲𤷪𤺧，官都冇面畀，加重語氣講多次「我哋門檻係唔踩得，唔該你落番嚟！」
正所謂入村隨俗，入鄉問禁，如果在新界被人誤會挑釁就真係大件事。


E-mail：[email protected]