李奧費迪南貴為全球最貴後衞，喺日前轉會曼聯後首次見記者，都執得特別正，黑恤衫白西裝咁，好鬼醒神。
有啲英國傳媒就大讚佢衣着有品味，又話佢咁着係有深層意義，意味住佢係「白武士」，嚟到曼聯打救佢哋，協助球隊重奪英超聯冠軍同埋歐冠盃咁話。不過，我求大俠都係認同英國《太陽報》嘅觀點多啲，覺得李奧費迪南咁着真係好鬼似七八年大受歡迎嘅電影《油脂》之中，主角尊特拉華達嘅造型。其實，李奧費迪南對唱歌跳舞都好有興趣，唔知片商開拍類似《油脂》咁嘅戲時，會唔會搵佢客串，甚至擔正呢！

伯明翰輸波布魯士請息怒
球隊喺季前熱身賽，通常唔會太認真，不過喺英超「升班馬」伯明翰作客輸畀蘇超聯球隊利文斯頓一比二嘅友賽，兩隊都踢出火，各有一個球員被逐，最㷫嘅係領隊布魯士，佢猛話蘇格蘭球證執法水平差，重話以後都唔會帶隊到蘇格蘭踢波。嘩！使唔使咁勞氣呀？