【好激呀!】容祖兒報答張敬軒助調音 主動提出做「代母」幫生仔
蘋果日報 2019/08/22 16:04
容祖兒張敬軒代母
容祖兒的紅館演唱會已進入倒數階段，昨晚第16場，胡定欣、周柏豪、莊思明和江嘉敏等捧場，觀眾期待的特別嘉賓環節，終於輪到「大會星級調音師」兼好友張敬軒登場，祖兒語出驚人表示如軒仔找不到女友替他生仔，她可請纓替他做「代母」，令軒仔啼笑皆非。
祖兒的演唱會一直未唱《黃色大門》，她昨晚唱到一半，舞台升起，觀眾即熱烈向軒仔歡呼，兩人合唱完，軒仔即上前擁抱兼錫錫祖兒後說：「good個騷先。」牙尖嘴利的祖兒即說：「呢個人真係唔話得，我哋多數奚落佢，整蠱佢......哈哈。」軒仔心中有數又要被揶揄：「你老老實實，唔好亂講嘢。」祖兒再進攻：「你對我大恩大德，沒齒難忘，但係我真係好想講，我好記得有一日，佢同我講：『謝霆鋒真係好靚仔？』」軒仔一臉尷尬，祖兒再得寸進尺：「如果關智斌係靚仔，佢一定係最靚仔，哈哈哈.....」觀眾大笑起來，軒仔即為之語塞，想了一會才反問：「你都講得啱，為乜唔講我個名？」祖兒聽後答：「咁你就係頂級絕世帥呆男，大家唔覺得咩？畀啲反應嚟聽吓。」祖兒續說：「你知唔知你靚喺邊？你靚喺個心度。」軒仔答：「咁啱嘅，我覺得你都係呀！」
軒仔非常有心，昨晚除上台獻聲，更給祖兒送上他跟台前幕後團隊給祖兒送的卡。軒仔心痛祖兒為演出捱個七勞八傷，他自爆後台見過祖兒換衫：「冇人睇到佢身上幾多傷，我有幸可以睇到。你平日着衫係『瀡』入去，我喺後台見到佢少布嘅時候……」祖兒聽到後很震驚，軒仔再說：「我耐唔耐會『裝』吓。」祖兒笑罵他是「無賴」，軒仔說：「算啦，睇完都唔知睇到乜....哈哈。」軒仔爆料祖兒每晚穿高踭鞋跳舞，為此皮外傷要貼膠布，內傷也不少，昨日開騷前還去針灸及看骨科。軒仔指祖兒堅持每晚以最佳狀態見觀眾：「佢怕令大家失望，不斷付出，真係搵命博，我未見過一個artist喺凌晨完騷，喉嚨仲插住六支針，就係為咗保證第二日有一個最好狀態見大家！」祖兒被軒仔所言感觸落淚，歌迷安慰祖兒，台上的軒仔即上前抱抱，他肉赤祖兒總是一個人承擔所有問題，變成壓力好大。祖兒都也感謝軒仔每晚到紅館幫忙打點：「點解會有個咁好朋友。」祖兒不忘替軒仔跟中樂團合作的11月個唱賣廣告，她卻口快快把「中樂團」講成「啲打」。
對於軒仔每晚的付出，祖兒想到以身相許以外的報答方法：「如果你需要一個人，將來識唔到一個女朋友都好，我可以做『代母』，喺泰國捐精，哈哈哈.....」觀眾捧腹大笑，軒仔都被祖兒所言嚇窒：「咁我泰國搵得啦....」祖兒叉腰反問: 「做咩？而家我好失禮你咩？我差啲咩？」軒仔坦言：「你啲基因都好好，我覺得呢世，珍惜做朋友緣份就夠啦，第時我去你屋企，我應該叫你媽咪外母好，定auntie好？有單身男士，真係可以上IG留言畀祖兒。」祖兒無奈，軒仔則說：「容祖兒真係乜嘢都有啦，身邊人嘅愛都有，就係差一頭好人家！」祖兒搞笑說：「一炷香係咪？」
兩人吹水後便合唱一曲《櫻花樹下》，觀眾再叫「安歌」欲留着軒仔，他果然早有準備，即場變身惡搞祖兒的「火龍果」，二人合唱《Pretty Hungry》。
祖兒今日更新facebook多謝軒仔，她以「蘇眉」形容軒仔，她回憶昨晚在台上的感性一幕，並說：「昨天為大家帶來一道菜式，洋蔥大爆火龍果，手勢直逼男神chef檸檬，果真殺我一個措手不及，張敬軒、你好嘢，邊有人爆人料，仲可以搞喊人㗎。」祖兒承諾會繼續做好，她感性說：「只要我一天還有呼吸，我就是你今天見到的。」