落後一球，刺激未夠；輸到兩球，小豆營救。曼聯上周六晚作客阿士東維拉，在先輸兩球之下，靠「新蘇斯克查」查維亞靴南迪斯（小豆）梅開二度兼令對手擺烏龍，以3:2反勝維拉，續排榜首。曼聯今季第8次反敗為勝，可說是當今的反勝王！
曼聯上半場表現老鼠拉龜，完半場前，維拉安祖斯韋文的勁射更先開紀錄。雖然曼聯換邊後立刻換入小豆，但安祖斯韋文在50分鐘再入多球，助維拉領先到2:0。

小豆入替入兩粒

落後到兩球紅魔吹響反攻號角；8分鐘後史高斯長傳，小豆突破越位，射穿維拉門將巴特古辛的大細龍門，為曼聯先追一球。63分鐘，拉菲爾傳中，遠柱的小豆射門省中維拉的華亞爾入網。雖然賽會將這入球算為華亞爾的烏龍，但曼聯領隊費格遜及小豆都認為這是屬於後者的入球。曼聯之後圍攻，尹佩斯妙傳小豆頭槌建功；曼聯以3:2反敗為勝，全取3分續排榜首。
在今季17場比賽入面，曼聯有10場法定時間試過落後，其中多達8場逆轉贏波！數遍歐洲，巴塞隆拿反勝場數僅次曼聯，可見紅魔韌性。費格遜賽後大讚全隊鬥心，但對防守表現略有微言，「我對於第2個失球感失望，無理由無人看守禁區內對方的球員。雖然最後贏波，但我認為球員今場有壓力。」此外，朗尼下半場足踝受傷，或未能代表英格蘭出戰周中對瑞典的友賽，而阿仙奴的禾確特亦因傷上陣成疑。
咖喱