日本藝能界今年爆出多宗星二代醜聞，數到最爆當然係61歲資深女星高畑淳子嘅寶貝仔高畑裕太強姦被捕，而70年代經典日劇《新青春火花》已故女主角坂口良子嘅親生女坂口杏里，都因為沉迷幫襯鴨店而孭上至少500萬日圓（約38萬港元）巨債，坂口杏里已淪為艷星下海拍AV，呢個敗家星二代成為圈中熱門話題，勢估唔到連著名導演北野武都唔執輸，自言想搵高畑裕太同坂口杏里合演三級片！

北野武接受日本報章《東京Sports》受訪時好認真咁話：「目前正構思搵坂口杏里演出，開拍一套新片，男主角正是高畑裕太。」北野武指故事情節會抄足高畑裕太嗰單強姦案，因為自認性慾強嘅高畑裕太於犯案時曾要求一名酒店女員工將牙刷送到房間繼而施暴，北野武話高畑裕太喺片中當然唔可以少得「攞牙刷畀我！」呢句對白，更希望兩位主角可以喺鏡前肉搏。