當年今日
關於我們

老人家要𠱁嘅

蘋果日報 2005/06/20 00:00


老人家有時真係好難搞,我老爺唔知點解最近性情大變,以前好似開籠雀,忽然終日坐在家中默不作聲,又話父親節唔會一家人去街食飯,更加唔收任何禮物,令到我老公好擔心。佢哋成家人係好有感情,但係又唔會講出口嗰隻,凡事擺在心上,唔知點表達自己愛心,於是就難為了我呢個家嫂。父親節當日,上到老爺奶奶家,拿出一個便當,放在老爺面前:「老爺,孝敬你嘅!」老爺用眼尾掃掃個盒:「都話乜都唔要咯!」「我諗住你鍾意食銀鱈魚,整個好味銀鱈魚便當,你唔食我同奶奶食﹗」他忽然站起來,夾了一塊魚肉放進口內:「試吓都唔拘!」跟住漸漸多嘢講,話擺到咁靚,梗係好複雜嘞?其實只要將魚塊放入由砂糖、豉油同梅乾整好的調味料一齊煮,到汁料收乾即可。再將獅子狗魚蛋蘸上炸粉放入滾油炸,再細心擺設,放些煮熟的豆角、梅乾在魚肉上,白飯上則放甜生薑絲同炒熟的黑芝麻,咁就又靚又好味。老人家同細路仔一樣,都係要𠱁嘅!(十七)老二中吉