季尾馬圈其中一個焦點，必然是冠軍騎師之爭。莫雷拉下季轉戰日本，當然希望可再奪冠軍完成四連霸，留個美好回憶。

另一邊廂，長期辛苦減磅的潘頓早已下定決心重奪冠軍，兩人近期陣上有不少埋身肉搏的鏡頭，鬥志鮮明，兩人盡擸實力座騎，成為馬迷的追捧對象。

昨日（1日）沙田賽事，莫雷拉與潘頓的頭馬數字二比一，最新騎師榜形勢是潘頓以128Win繼續領先，莫雷拉以125Win緊隨第二名，雙方差距縮窄至三場頭馬，倒數最後四次賽事好睇過大台劇集。

周三（4日）谷草夜賽，莫雷拉的座騎實力甚強，有望進一步追貼潘頓。

其中，第六場三班1200米的「精算八方」，升上三班後跑兩場均排不利檔位，一仗留後、一仗放頭都輸得近，三班肯定仲有分在手。今番移入5檔再跑谷草1200米，有力贏取在港第四捷。

由蔡約翰訓練的「精算八方」上季來港服役，首戰即在田草1000米開齋，當時未熟左穿右插仍衝贏。

此馬是蔡約翰為「精算」系馬主挑選回來，質素自然有保證。事實上，「精算八方」在港已獲取三冠一季，田草、快活谷都識贏，其中以谷草短途最擅長，分別在1000及1200米取勝。

大前仗在莫雷拉胯下贏四班1200米，孭住133磅仍輕取對手，升班再出跑兩次同程，前次8檔配杜利萊留後衝近第五。

上場雷神回策但排12檔，焗住搶放，頭800米快至45秒95，較同晚二班賽一放到底的「旺蝦王」所造45秒99還要快，最終「精算八方」埋門腳軟只跑第五。

今仗以同一配搭抽排5檔，形勢比上兩次好，有力重振聲威征服三班。