【「蘇兒戀」前傳】容祖兒孖新歡遊東京4日3夜 前後腳返港掩人耳目
蘋果日報 2019/08/26 12:46
容祖兒Gavin So蘇兒戀
39歲容祖兒和已為人夫的王菀之叔仔Gavin So爆戀情，《蘋果》連月追蹤，發現兩人約會時十分低調，祖兒必戴口罩和帽子遮樣，似有曖昧。
貌似梁競徽的Gavin任職連鎖食店高層，跟圈中人十分熟稔，據知情人士爆料，祖兒跟Gavin於半年前擦出愛火花，兩人暗地裏又睇戲又煎牛扒又夜跑，今年6月16日祖兒生日，兩人本計劃14日飛曼谷慶生，但臨出發一星期前取消行程。
知情人士透露，「蘇兒戀」為掩人耳目，延遲至7月改去東京補祝生日，《蘋果》根據線報到機場守候，7月11日下午3時許，果然發現祖兒現身，戴魚夫帽、口罩的她將樣子遮到實，由司機和女友人陪同到機場，匿埋一角不停撳手機，之後單拖由禮遇通道入閘，而Gavin則避過記者入閘。
7月14日，兩人結束4日3夜之旅前後腳返港，祖兒搭早一班機於下午4時許單拖抵港，同樣戴口罩和漁夫帽急步出閘，邊行邊謹慎四圍望，由司機接載離去；而搭遲一班機的Gavin則於6時50分抵港，出閘口後急步行去停車場，等車期間連扯了兩支煙，還將煙頭隨地丟，沒有公德心。
採訪、攝影：黃曉程、徐錦池、吳耀輝、朱志聰