60億美元係幾多錢？濕濕碎啦，都未夠買電盈（008）全部資產！在香港也屬小數目，在國際更是芝麻綠豆者。
剛炒燶天然氣期貨的對沖基金Amaranth，埋單計數「瓜」60億美元，接近一半其管理的資產。一單比98年「長期資本管理」（LTCM）撒手塵寰時蒸發的逾40億美元的羞家事，不幸事，為甚麼沒有為金融市場帶來震盪，反而成為茶餘飯後的笑話？
其實分別在於LTCM利用槓桿原理，以56倍作地氈式（瓣瓣掂）炒賣，以為是diversification（分散風險），卻不知是di'worse'fication（愈分散愈衰）。因為只要一瓣中招，便可以全軍盡墨。瞧瞧Amaranth只用1.3倍槓桿，可謂真金白銀賭落去，輸咗仍身光頸靚，毋須驚動官府大老爺救命，何況只係衰一瓣少用槓桿的，不致會燎原，又何懼之有？
近年對沖基金崛起，如雨後春筍。據統計，全球有超過8,000間此類公司，共管理超過1萬億美元資產，未使用槓桿都足以翻雲覆雨，汝道用埋此原理，其影響力有多大？實在不能想像！
然而，商品期貨近年之受對沖基金垂青，據聞乃受兩位名教授──賓夕凡尼亞大學的葛頓（GaryGorton）和耶魯大學的路雲海斯特（GeertRouwenhorst）發表的研究報告，指從歷史數字統計，商品期貨回報率不低過股市所影響。