當年今日
關於我們

大小玉女上海剪綵
嘉欣萬元皮草撼柏芝LV

蘋果日報 2002/01/02 00:00


李嘉欣昨日穿上YSL低胸上衣及長褲,配以十多萬Fendi皮草,跟穿上LV裙的張柏芝一同在上海剪綵,雖然柏芝行頭未及嘉欣,但現場聲勢卻比嘉欣熱烈。不過,兩位玉女同場未有交談半句。 記者盧雪琪、王光鴻上海直擊
李嘉欣與張柏芝兩位靚女,昨日一同於上海為佘山銀湖別墅開盤典禮剪綵,兩人更鬥騷行頭,嘉欣穿上過千元的YSL低胸上衣及長褲,配以十多萬元Fendi皮草出現,撼低柏芝的萬多元LV短裙,但論聲勢和現場反應,則柏芝較嘉欣受歡迎。不過兩位靚女碰面時,只是互望一眼,並沒有打招呼。

惹男士垂涎
事實上,一眾出席剪綵儀式的靚女中,只有柏芝和嘉欣獲得貴賓式招待,兩人被分別安排乘坐勞斯萊斯到場,現場更奏樂以示歡迎,氣派十足。
嘉欣性感的打扮,引來上海男士垂涎,欲窺望嘉欣胸前春光,嘉欣連忙以雙手掩護。
柏芝唱片公司高層陳少寶日前炮轟新城,因柏芝缺席頒獎禮而不給獎項一事,柏芝對此笑說:「我冇失望,之前我部賀歲片(《福星報喜》),拖到十二月尾開工,由於電影要喺一月頭拍完,所以唱片公司喺呢段時間唔幫我接任何嘢,就連頒獎禮我都唔會出席。因為我唔出席而冇獎冇所謂,一切隨遇而安!不過,我成年成績都唔差吖,我首歌《最新形象》喺新城個榜都上過第一位啦!」

懶理食白果
柏芝又說:「其實我出道以來都唔鍾意同人鬥,總之新年人人有獎大家開心咪得囉。」
此外,有份剪綵的黎姿因扭傷行動不便,獲安排坐輪椅出席,而有份出席的楊恭如、張文慈和翁虹,風頭盡被嘉欣和柏芝掩蓋,猶如布景板。