【新增記者會、見面會內容及圖片】
因演出韓國選秀節目《PRODUCE 101》男團版而出道嘅限定男團Wanna One，將於下月首度襲港於亞博館開騷，而Wanna One噚日就出發去泰國，為今日嘅見面會做準備，不過佢哋現身泰國機場時就遭大批粉絲包圍，雖然當地已派出數十名保安，不過依舊場面混亂，成員被逼到差啲上唔到車，要經理人衝去「救人」。

噚日Wanna One 11位成員一現身機場，大批粉絲立即失控，瘋狂尖叫及湧上前，令唔少成員被推至險些跌倒，更有粉絲趁亂亂摸成員，當時經理人阻止粉絲接近成員時，已被影到拍打粉絲嘅頭。

當Wanna One離開機場、準備上車時，現場更係陷入大混亂，粉絲好似暴動咁衝破保安防線，包圍偶像，大部分行後面嘅成員被困粉絲堆，上唔到車，經理人立即衝入人群拉出Wanna One成員，經理人更因此大發脾氣，想上前跟粉絲起衝突，當地保安立即拉開經理人。

女團少女時代（少時）隊長泰妍上月飛抵印尼時，亦同樣獲大批粉絲接機，當時粉絲亦失控包圍泰妍，有人更趁亂胸襲及摸泰妍屁股，更推跌泰妍，令泰妍坐喺地上崩潰大哭，當時網民已留言批評粉絲追星時唔注意安全，表示粉絲嘅行為會拖累偶像嘅形象。而Wanna One飛抵泰國嘅影片於網上公開後，引起網民討論，留言「太誇張啦」、「希望大家可以自律」、「唔好令藝人受傷」等。

雖然噚日被泰國粉絲嘅熱情嚇倒，不過成員今日如常出席活動。舉行見面會前，成員先穿上西裝現身記者會，又雙手十合打招呼及跟主持人學講泰文。提到宿舍生活，Wanna One表示成員之間就好似家人一樣，佢哋亦成日一齊打機，感情好好。

Wanna One首個海外粉絲見面會於香港時間7點15分左右開始，11位成員以校服Look勁歌熱舞《PRODUCE 101》主題曲《Pick Me》打頭陣。