【是日必炒】萬事俱備，南航乘風啟浪（譚朗蔚）
譚朗蔚
上日個市高開低收，已經是連續第二日低成交了。雖然，你可以將其演繹成沽壓有限，但是恒指連續四日失守了最低的均線100天線，橫睇掂睇，真是看不出有特別看好的理由，尤其是外圍差。至於外圍點樣差？美股納指在上週四忽然急插，FAANG尚好，但是微軟同特斯拉出出地事，穿50天線會幾難睇。至於A股，上證同滬深300麻麻地。你恒指本身都垃圾架喇，外圍仲搞成咁，你想幾強？
小米（1810）同巴巴（9988）染藍咁耐衰足咁耐，為恒指帶來了新的向下動力。之不過咁，ATMX裡頭，依家最弱的是騰訊（700），話晒佢10天線、20天線跌穿50天線，死亡交叉，是多頭排列的強勢被破壞，要估頂絕對是估佢先。所以後市要睇緊502蚊，只許成功，不許失敗。至於美團（3690）、小米和巴巴，由於均線多頭並無破壞，因此以現階段來睇，只屬皮毛調整，但是後市係點我唔包。
市場的氣氛麻麻，自然繼續不會揀科技股。今日同大家推航空股，我揀南方航空（1055）。隨著疫情受控，經濟重啟，旅遊復甦便是投主題。內地民航局話，上月航機的升降量已經返回疫情前的九成，認真犀利。油價低殘，人民幣高企，全部都利好航空。技術上，股份在低位轉多頭，升勢明顯，還收復了2018、19年阻力，是另外兩家同業不能及。因此確信買入，現價買，目標5.80，止蝕4.20。
-----------------------------
-----------------------------
----------------------------