鍾鎮濤舊愛、現年59歲嘅陳秋霞喺舊年驚爆患乳腺癌二期，姨甥女鄺靄慧係養和醫院乳腺外科名譽顧問醫生，即刻安排接受長達半年嘅抗癌療程，一直以正面樂觀面對病情嘅陳秋霞，最後抗癌成功走出鬼門關！(新聞連結： http://bit.ly/2yHboty )

陳秋霞日前接受周刊訪問，講到佢嘅治療經過，陳秋霞先返咗去吉隆坡約咗好友食飯，再處理基金會嘅事，然後開始自己計劃，保密功夫做足，喺治療過程一直冇人知，但係佢話自己有試過專登喺醫院門口等的士，但冇人影佢相，搞到佢覺得自己好似冇人理而有啲唔開心，不過佢一直冇為自己個病喊過，每日笑住面對！

喺舊年11月，陳秋霞做完腫瘤切除手術之後，本來醫生提議可以做電療而保住左乳，不過佢聽完醫生嘅解釋後，決定將左乳切除，甚至亦冇做重建，而呢個重大嘅決定，陳秋霞冇同過老公鍾廷森商量，連傷口都冇俾佢睇過，佢覺得老公已經70幾歲，只係要知道個老婆死裡逃生就夠，做化療嗰陣甩晒啲頭髮，陳秋霞包住個頭瞓覺，佢坦白話自己都唔知點解，原來有啲關口，就算係最親嘅人都唔可以見到！

有咗呢個人生嘅重大經歷，陳秋霞話已經改變咗生活，一星期會做5次運動，仲會物色啱嘅泳衣，游水做運動，因為佢要食10年藥，食完頭嗰2年，要換另一種藥，但係會影響骨骼，所以佢話要做定準備，事關佢仲有好多地方想去，陳秋霞仲搞笑話，最大得益係佢老公，因為個老婆改變咗好多，唔再發脾氣！

不過喺陳秋霞抗癌期間，屋企發生咗一啲糾紛，事緣佢老公嘅公司一直由4個姪打理，當佢三個女畢業之後，被安排去咗公司幫手，點知因為呢個原因，老公同佢細佬搞到分家收場，最後陳秋霞用其他公司嘅股份嚟換返自己嘅公司，三個女可以努力做好本份，成件事亦完滿解決！