貿易戰開打以來，中國可以話被撳住嚟砌，但相對地美國亦攞唔到乜嘢甜頭。中美關係情勢之轉變，2008年是關鍵。當一國樓市炒到爆破，往往代表由最盛一點轉衰。樓市唔同股市，樓作為一種必需品，其牽涉金額之巨，覆蓋人口之廣，無出其右。歷史經驗說明，樓市爆破，國家經濟將沉寂相當長時間。於是當美國2008年發生次按風暴，中國判斷美國國力要向下走，中國看待西方國家先進制度的心態，漸漸由大丈夫當如是也，變為彼可取而代之。

那段時間，「中國模式」四個字經常出現，顯露了北京認為自身制度、做法可以與西方鼎足。結果美國選擇以QE印銀紙救市，一時之間大水漫灌，中國基於結匯制度，外匯儲備爆升至逼近4萬億美元，基礎貨幣亦侷住跟印。美國資產泡沫爆破，乾坤大挪移，變為中國資產泡沫形成。時至今日，中國房地產總值450萬億人民幣，超過美國、歐盟、日本三國房地產總市值，超過中國GDP 5倍。身家暴漲，就如同80年代的日本，中國相信冇嘢唔可以用錢買返嚟，對外拓殖之心更現。

以鄰為壑治水，洪水淹至，也有退潮一刻，中國當然明白。天下間並無印錢紙就可以逃避循環嘅道理，QE放水係為咗將來抽水。中國如果唔做嘢，現行結匯制度在美國收水時，會被動地陷入通縮。參考近百年大國崛起之經驗，中國決定模仿四大貨幣，包括大不列顛帝國的金融殖民（英鎊）、美國馬歇爾計劃及石油美元（美元）、日本黑字還流（日圓）、德國萊茵資本主義（馬克）。企圖藉由提升人民幣國際影響力，抗衡美元萬劍歸宗。一帶一路、亞投行、人民幣躋身SDR權重，連聯儲局亦史無前例暗示忌憚中國貨幣政策，中國步步進逼，聲勢一時無兩，直至美國選出個特朗普。

唔可以畀中國主導國際規則，奧巴馬時代已講過，然而奧巴馬只採取柔性策略。TPP聯合各國將中國摒除在外，為連橫；中國推RCEP、一帶一路拉攏各國話有錢齊齊搵，為合縱，其時中美雙方仍屬柔性較量。可是70歲的特朗普嫌你太慢，一上場就退出TPP，以退出各種多邊協議為籌碼，重新洽談雙邊協議，再喺雙邊協議中加入毒藥條款針對中國。至此中國先發現遇上一個手段雷霆之人，在舊規則舊制度內搵漏洞鑽空子此路不再通。

貿易戰之初，亮劍、勿謂言之不預，配合斬釘截鐵的眼神及語氣，中方能夠講嘅都已講，結果中興事件及經濟制裁解放軍部長，先知道邊個中咗獅子偷桃。中國再度反思同西方先進國家的差距，韜光養晦之聲再起，但潘朵拉的盒子已被打開。盒子裡裝住懷疑、猜度、忌諱、忿恚……原本大家當睇唔到，釋放出來後事情就難以扭轉。貿易戰作為一種手段，會有落幕一刻，只係新的手段等住接力。

Mr. Tregunter

investMAN
For People of Style & Substance
掌握理財智慧 感受生活品味
http://facebook.com/investMAN.hk