無綫總經理認真唔易做，陳志雲除咗要管理大班同事，仲做埋主持，佢嘅《志雲飯局》做到街知巷聞，𠵱家仲由公仔箱跳上舞台，實行玩大佢！《志雲飯局》會搞個慈善舞台版《志雲飯局LiveonStage》，4月27至29號喺文化中心公演，為生命熱線籌款。噚日陳志雲喺尖沙嘴舉行記者會，仲請咗陳寶珠、鄭經翰同軟硬撐場。

喺舞台版《志雲飯局》中，陳志雲每晚會訪問三個嘉賓，包括曾志偉、鄭裕玲、側田同謝偉俊等，陳志雲話：「呢啲嘉賓有啲我訪問過，有啲就未，但近年佢哋都發生咗好多事，可以再做訪問，內容未定，到時會有人唱歌，有觀眾發問或者投票機會都唔定。」問陳生會唔會叫側田除帽？佢話：「遲啲先啦。」
志雲愛將崔建邦噚日自薦做司儀，但志雲一上台就發揮吹水口才，踢爆愛將近排失戀，仲話：「我同你（崔建邦）行街買咗對鞋，着咗可以高4分3吋，你做乜仲唔着呀？」搞到崔建邦無力招架，只識得喺旁邊陪笑。問崔建邦係咪同唐詩詠分咗手？佢話：「我一向都係單身，單身仲好，可以多啲工作機會。」陳志雲聽到就繼續玩踢爆話：「佢呢排先單身之嘛，不過未結婚都可以當單身嘅。」真係唔知佢哋邊句真邊句假呀。