世界難撈，食肆都要諗諗新菜式吸客。天后尚囍就推出「山埃牛肉烏冬」，要去到落毒咁出位？呢味疑似「殺人料理」，係餐廳精選午餐其中一款（圖），其他4款都係賣37蚊連飲品，惟獨呢款要貴一蚊，賣38蚊，好似有網友話齋，山埃都要錢。

#原來係山根

費清同好多網民一樣，最初都估可能只係餐廳寫錯字，實際係想寫「山崎牛肉烏冬」之類。費清就打去間食肆度八吓，點知……負責人華仔話，冇寫錯字，山埃牛肉烏冬係大廚命名嘅，佢哋仲有一味餸叫山埃牛仔骨煲！華仔解釋，其實山埃即係山根，係大廚諗出嚟同大家開個玩笑，搞笑吓咋，「睇吓啲人夠唔夠膽食！」
佢仲話，山埃牛肉烏冬係一、兩個星期前推出，反應OK啦，至於個山埃牛仔骨煲就上周三上市，反應唔錯，唔少客人叫嚟食㖭。樓面阿姐就話，啲客都有問山埃究竟係咩嚟，當知道到唔係毒藥，只係山根之後，都笑笑口話試吓食山埃都好喎。其實呢間食肆喺OpenRice有9個評價，其中8個係好評，唔錯㗎。
明明寫係山埃，但其實係山根，咪違反商品說明條例？但如果唔違反……就真係落毒喇喎。
＃要生計，也要生活 ＃毋忘初衷
費清